Tveir vitar standa utarlega á Skipaskaga. Sá eldri er utarlega á Syðriflös, steinsteyptur turn, byggður árið 1918. Ljóshús hans hefur verið endurnýjað og er ekki upprunalegt og þessi viti, sem hannaður er af Thorvald Krabbe verkfræðingi, hefur ekki verið í notkun síðan árið 1947 að kveikt var á nýrri vitanum sem stendur skammt ofan við flösina.
Nýrri Akranesvitinn, sem byggður var á árunum 1943–1944 eftir teikningum Axels Sveinssonar verkfræðings, en tekinn í notkun 1947, er 22,7 m á hæð, sívalur kónískur turn úr steinsteypu og ljóshúsið er sænskt. Stoðveggir, átta talsins, ganga út frá sökkli. Vitinn var húðaður með ljósu kvarsi í upphafi en hefur nú verið kústaður með ljósu þéttiefni.
Ljóstæki eru ensk og vegna seinni heimsstyrjaldarinnar varð dráttur á afhendingu þeirra sem seinkaði því að vitinn yrði tekinn í notkun. Gasljós var í vitanum í byrjun, magnað með 500 mm katadíoptrískri linsu, en árið 1956 var hann rafvæddur.
Heimild: Sjá hér
Mynd: Sverrir
Akranesviti er áhugaverður staður á Íslandi sem vert er að heimsækja.