Búlandstindur

Búlandstindur er 1069 metra hátt basaltfjall í Djúpavogi og er talið vera um átta milljón ára gamalt. Fjallið þykir almennt vera í hópi formfegurstu fjalla á Íslandi og hefur löngum vakið athygli bæði ferðamanna og heimamanna. Sumir trúa því að Búlandstindur sé sérstakur orkustaður og leita margir þangað til að upplifa kyrrð og náttúruafl svæðisins.

Um 700 metrum austur af Búlandstindi gengur fjallsrani sem nefnist Goðaborg. Samkvæmt þjóðsögum er talið að menn hafi borið þangað goð sín skömmu eftir kristnitöku og steypt þeim fram af fjallsgnípunni. Aðrar heimildir segja Goðaborg vera breiðan og sléttan hamrastall norðaustan í fjallinu, ofarlega í hlíðinni. Þar á að hafa verið vatnslind og jafnvel staður þar sem fórnir voru færðar goðunum til árs og friðar.

Gönguleiðin

Fjöldi fólks leggur leið sína á Búlandstind á hverju ári, enda er útsýnið af tindinum einstaklega tilkomumikið. Best er að fylgja vegarslóða sem liggur meðfram Búlandsá sunnanverðri og inn dalinn að stíflu. Þaðan er gengið beint upp grasi grónar brekkur og skriður innan við Stóruskriðugil, í átt að skarði innar í fjallinu.

Þegar komið er upp á hrygginn fylgir leiðin sér að efsta tindi. Háttindurinn er mjór og brattur klettarimi, en útsýnið þaðan er stórbrotið yfir Berufjörð, Álftafjörð og fjallahringinn umhverfis Djúpavog.

Mjög mikilvægt er að gæta varúðar, sérstaklega ef skyggni er slæmt eða hálka á leiðinni. Forðast ber að ganga of langt til austurs, þar sem austurhlið fjallsins er þverhnipt og hamrabelti brött. GSM-samband er almennt gott á tindinum, en fjallið krefst engu að síður góðrar aðgæslu og viðeigandi búnaðar.

Heimild: Sjá hér